ՀՀ հանրային ծառայությունները կարգավորող հանձնաժողովը, կարևորելով բնական գազի և էլեկտրական էներգիայի սակագների վերանայման գործընթացի վերաբերյալ, հանրության իրազեկվածության ապահովումը, սույն թվականի մայիսի 29-ին հայտարարել էր, որ բոլոր շահագրգիռ կողմերը, ովքեր նշված գործընթացի առնչությամբ ունեն գրավոր կամ բանավոր առաջարկություններ, կարող են մինչև 2013 թվականի մայիսի 31-ը, ժամը 18:00-ն դիմել հանձնաժողով կամ ներկայացնել դրանք հանձնաժողովի հեռախոսային թեժ գծով:
 Հանձնաժողովը, ամփոփելով ստացված առաջարկությունները, հայտնում է, որ նշված ժամանակահատվածում դիմել է 35 քաղաքացի, որից 3-ը` գրավոր, 4-ը` էլեկտրոնային փոստով և 28-ը` թեժ հեռախոսագծով: Ներկայացված առաջարկությունները հիմնականում վերաբերում են բնական գազի սակագինը չբարձրացնելու, հանրային լսումների կազմակերպման, իրենց գրավոր դիմումների պատասխաններ ստանալու և ստեղծված իրավիճակի մասին մտահոգության թեմաներին:
 Հանձնաժողովը տեղեկացնում է նաև, որ մայիսի 29-31-ն ընկած ժամանակահատվածում, բնական գազի և էլեկտրական էներգիայի սակագների վերանայման գործընթացի վերաբերյալ առաջարկությունները ուսումնասիրելու նպատակով, հանձնաժողովի աշխատակազմի համապատասխան ստորաբաժանումների և սպառողների շահերը պաշտպանող հասարակական կազմակերպությունների, մասնավորապես` «Բնակարանային-կոմունալ ոլորտի աշխատողների միություն» Հ/Կ, «Սպառողների ասոցիացիա» Հ/Կ, «Համատիրությունների նախագահների ասոցիացիա» Հ/Կ, «Հասարակական պաշտպանների միություն» ԻԱՄ, ինչպես նաև, անհատ քաղաքացիների հետ համատեղ, կազմակերպվել և շարունակում են անցկացվել աշխատանքային քննարկումներ, որտեղ հնարավորություն է ընձեռվում` ներկայացնելու սեփական առաջարկությունները:

ՀՀ հանրային ծառայությունները կարգավորող հանձնաժողով